Welkom / Welcome

WILLEM PRINSLOO LANDBOUMUSEUM 

 

RAYTON

 

Die Museum is ongeveer 45 km van Pretoria op die N4-snelweg na Witbank geleŽ. Neem afrit 27 en volg die bordjies wat met 'n stoomtrekker aangedui word.

'n Besoek aan die Landboumuseum bied lafenis vir die gejaagdheid van die hedendaagse lewe en vul mens met nostalgie na die dae van weleer. Die Museum bied 'n unieke verskeidenheid fasiliteite vir die jeug, gesin, organisasies en sakemanne of persone wat sommer net in 'n rustige plaasatmosfeer wil ontspan.

Die Museum beskik oor die grootste versameling landbou-implemente, -toerusting, trekkers en rytuie van weleer in die land. 'n Nuwe moderne uitstalling oor die geskiedenis van landbou vanaf die Steentydperk tot c.1945 asook 'n uitstalling oor implemente wat deur diere getrek is, kan ook besigtig word.

Die woning op die Ou Werf dateer uit die tagtigerjare van die vorige eeu en kultuurdemonstrasies word op verskillende dae (behalwe Sondae) aangebied:

Die smidswinkelbedryf

Rieme insout, brei en sny

Swepe vleg

Brood bak in buite-bakoond

Klein koekies bak in ou plaaskombuis

Seep kook

Melk en room afskei

Vetkerse maak

Botter maak

Ganse pluk

Koffie brand en maal

Koeie melk tussen 09:30-10:00, naweke 07:30-08:00

Donkie draai die bakkiespomp

Osse ploeg

Perderitte

 

Skool- en volwasse groepe moet vooraf reŽl vir begeleiding en spesifieke demonstrasies.

Besprekings kan gedoen word om die nuut gerestoureerde 1913-Prinsloowoning te besoek. Dit was die eerste woonhuis van Lang Hans Prinsloo - oud LV vir Bronkhorstspruit.

Tant Miertjie se Kombuis is 'n aangename kuier restaurant waar veral Sondae eg tradisionele voorbereide boerekos voorgesit word. Boonop kan die gaste die heerlike maal met 'n snapsie van die Museum se eie mampoer, witblits of likeur afsluit, of 'n flessie langsaan by Tant Kotie se Kontantwinkel aanskaf.

Gedurende die week is heerlike tuisgebak en ligte maaltye ook beskikbaar. Die restaurant kan ook van Maandag tot Saterdag bespreek word vir boere-ontbyte, troues, onthale of personeelfunksies met 'n spyskaart van u eie keuse (tradisionele kos, braaivleis of spitbraaie).

Vir die buitelugliefhebbers is daar lieflike koeltebome en voldoende braaigeriewe. Daar is ook basiese geriewe vir woonwa-eienaars wat in 'n rustige plaasatmosfeer wil kom uitspan.

Die Museum beskik oor 'n mooi en goed toegeruste lesingslokaal met sitplek vir 90 konferensiegangers. Daar is faks- en kopieŽrgeriewe terwyl verversings in die aangrensende restaurant beskikbaar is.

Een van die grootste bates van hierdie fasiliteit is die rustige plaasatmosfeer en die onbeperkte gratis parkering wat beskikbaar is.

Lapakraal is 'n kampterrein wat grens aan die museumkompleks en historiewe werf. Dit is geskik vir skole en groepe wat aktiwiteite van kulturele of opvoedkundige aard wil aanbied. Die rustigheid maak dit ook 'n ideale vergaderplek vir 'n bosberaad of sommer 'n kuierplek vir die gesin.

Lapakraal beskik tans oor 10 kamers met elk 8 beddens. Elke kamer het 'n toilet, wasbak en stort - beddegoed ekstra. NabygeleŽ is 'n eet/vergadersaal met 'n kombuis, stowe en yskaste. Die rietlapa met braaiplekke is 'n heerlike buitelug kuierplek na 'n dag se harde dinkskrum. Indien groepe nie self wil kosmaak nie kan die nodige reŽlings met Tant Miertjie se Kombuis getref word. Daar is 'n pragtige swembad vir huurders van Lapakraal.

'n Besoek aann die Willem Prinsloo Landboumuseum is 'n verrykende en genotvolle ervaring. Besoek ons en vergewis uself.

Die Gerhard Schoemansaal kan gehuur word en is geskik vir troues, danse, matriekafskeidfunksies en ander spesiale geleenthede.

Ander aantreklikhede op die ou plaaswerf (naas die 1880 Prinsloowoning) sluit onder meer die smidswinkel, Ndebelehut en 'n piekniekterrein in. Daar is ook perdewaritte en perderitte daagliks beskikbaar.

Die museum het 'n lisensie om sy eie mampoer en witblits te stook en maak ook 'n verskeidenheid likeure met 'n witblitsbasis en dit is in Tant Kotie se Winkel te koop.

Daar is ook fasiliteite vir perdeklubs om hul byeenkomste te hou en 'n veeveilingskompleks vir veilings, boere-dae en ander verwante demonstrasies.

Die museum huisves 'n groot verskeidenheid inheems gedomestiseerde diererasse, onder meer:

12 tipes vetstertskape

Kolbroek en Windsnyervarke

Inheemse hoenderrasse

Inheemse beesrasse soos die Nguni, Afrikaner en Drakensbergers

Asook 'n Nooitgedachterstoet en Percheron trekperde

Museums is ook pret. Feeste lok jaarliks 'n groot aantal belangstellendes na die museum. Oujaarsaand word 'n lewendige informele skuurdans aangebied terwyl die Nasionale Kennetjiekampioenskappe ook jaarliks hier gehou word.

 

Datums: Turskvyfees: 31 Januarie 1998

Mampoerfees: 2 Mei 1998

Kennetjiekampioenskappe: 4 September 1998

Veteraan Trekkerkarnaval: 5 September 1998

Sosatiefees: 24 September 1998

Skuurdans: 31 Desember 1997

 

Sillabusgerigte opvoedkundige programme word ses dae 'n week aan bespreekte groepe aangebied.

Vars bakoondbrood kan vroegtydig vooraf bestel word. Minimum van 10 en maksimum van 20 brode teen R7,00 per brood.

Die standaard skoolprogram behandel temas soos: die bakkiepomp (water), rol van die bees, brandmerke, ganspluk, outydse speelgoed, kerse maak, die smidswinkel en Ndebelehut. Spesiale temas soos: besoedeling, water, lug, bome, ens. kan op versoek aangebied word.

Vir inligting oor ons spesiale skoleweke (23-27 Februarie 1998, 27 April-1 Mei, 24-29 Augustus en 7-11 September 1998) skakel Frances de Wet by die museum.

 

MUSEUMTYE: Daagliks 8:00-15:00

Toegang: R7,00 volwassenes

R3,50 kinders

 

Bespreekte groepe:

Maandag - Saterdag 09:30 - 15:00

(Spesiale reŽlings vir Sondae)

R7,00 vir volwassenes

R5,00 vir kinders

 

Die volgende Voortrekkerkentekens word met voorafbespreking op Saterdae aangebied:

Plaaslewe

Ruiterkuns

Kultuurgoedere

Afrikanertradisies

Prys: R25 per kenteken

 

Navrae en besprekings vir die sale, lesingslokaal, Lapakraal of opvoedkundige rondleidings kan gerig word aan:

Willem Prinsloo Landboumuseum, Posbus 677, Rayton, 1000

Telefoonnommer: (01213) 44171/2

Faks: (01213) 44173

Restaurant: (01213) 44060


Back to: Web Internet        Webmaster:   PortAfrica On Line